Ngajaraken Murid Nile Demokrasi

Murid-murid SMP NU Babakan, Kabupaten Cerbon durung sue nganakaken pemilian raya ketua IPNU (OSIS, red). Pemilian ketua IPNU kang dianakaken Panitia Kusus Pemilian Raya (PKPR) IPNU SMP NU Babakan, ora kaya biasane lan umume. Yaiku madani cara-carane pemilian kepala daerah kang langsung (pilkadasung).   

Pemilian ketua IPNU kang digawe PKPR sampe werna rupa ambir mirip pilkadasung kang senyatane. Saben aturan pemilian dipadakaken kayadene aturan kang ana ning pilkadasung. Kayadene waya njaring lan ndaftare calon ketua, netepaken calon ketua, netepaken jadwal kampanye, jadwal nyoblos lan sejene.          

Ning pemilian ketua IPNU kien kang rame waya kampanye. Kanggo narik dukungan, wayane kampanye, saben calon ketua diiring murid-murid sejene, kang ndukung. Calon ketua IPNU, ditumpakaken ning gotrok, mbari diider-ideraken keliling sekolah. Terus saben calon ketua ngabal, nyampeaken maksud lan tujuane ning tengah-tengah lapang sekolahan ditonton kabeh murid SMP NU Babakan.

Miturut Ahmad Sanusi, guru kang mbina IPNU SMP NU Babakan, anane pemilian raya kang madani pilkadasung, iku tujuane ngenalaken nile pendidikan demokrasi maring murid-murid. “Kang jelas kita guru-guru pada ndukung. Kerana pada karo salah sewijine cita-cita pendidikan SMP NU Babakan. Yaiku ngebentuk murid-murid kang ndueni watek bagus ning tengah-tengah masarakat,” jare Sanusi ning Radar.

Jare guru kang lagi sekolah S2 ning IAIN Syekh Nurjati kien nyebutaken, yen pemilihan raya iku proses mbentuk generasi pengurus Ikatan Pelajar Nahdlatul Ulama (IPNU) ning SMP NU Babakan atawa ketua OSIS ning sekolah umume. Sejene kuen, murid-murid bisa ngrasakaken pilkadasung kayadene wong-wong tua ning Pilgub Jabar. “Mugi bisa gawe manfaat kanggo murid-murid,” Sanusi ngarepaken.     

Kepala Tata Usaha (TU) SMP NU Babakan Hadi nambahi, anane pemilian raya ambir nambah semanget murid-murid ning organisasi. Yaiku kumpulan kang rapi, kang ndueni tujuan. Dikarepaken uga, murid-murid dadine biasa ning hawa demokrasi. “Murid-murid NU kudu lan wajib hukume, ngawal proses demokrasi ning Negara kita, priben bae situasi lan kondisine,” tuture guru kang uga dadi ketua GP Ansor Babakan iki. (hsn)